كتبت: إيمان محمد
مسألتش نفسك كدة وأنت قاعد أزاي بعد م أمريكا دمرت اليابان لما ألقت عليهم قنبلة “هيروشيما وناغاساكي” ازاي اليابان قدرت تقف ع رجلها من تاني وبقت تعتبر دلوقتي من أقوي دول العالم؟.
في البداية كدة لو حابب تعرف لية أمريكا ضربت” هيروشيما وناغاساكي” بالتحديد فحابب إني اقولك ان مدينة” هيروشيما ” تعتبر من أكبر المدن التجارية ف اليابان وعندك مدينة ناغاساكي ودي كانت متخصصة ف صناعة السفن والذخيرة وفيها مناطق صناعية كتير..
وبعد دمار البنية التحتية في اليابان وكل حاجة اتدمرت ، بدأت اليابان ف انها تفكر ازاي هتقدر تقف ع رجلها من تاني ومن هنا فكرت ف أول عامل وهو الزراعة فبدأت بقي ياسيدي ف إنها تهتم بالزراعة ودة أول عنصر ممكن يخلي أي دولة تقف ع رجلها ، وبدأت تشجع الأيدي عاملة وبدأت فعلا انها تقدر تسد الإحتياجات الداخلية للشعب وبلغت نسبة الأفراد الي كانوا بيساهموا ف الزراعة الي 36% من حجم الشعب وده بعد الحرب مباشرة والنسبة دي هتقل كتير جدا وهتوصل ف عام 1955 ل 6.5% انت شايف التقدم؟
ومن بعد الزراعة بدأت ف انها تهتم بالتعليم وقامت بدمج التعليم مع التكنولوجيا وبدأت ف انها تبعت بعثات للخارج علشان الطلاب يقدروا يستفيدوا بأكبر قدر من التعليم ويرجعوا علشان يتم تطبيقه ف اليابان ،وف اليابان قبل الحرب العالمية الثانية التعليم كان للناس الي معاها الفلوس لكن بعد الحرب بقي متاح للجميع علشان الدولة تقدر تقف ع رجلها من تاني وف أسرع وقت ممكن..
بس تعرف اليابان رغم الي عمليتة سواء ف الزراعة أو التعليم فوق ده كلة مكنتش هتقدر تقف ع رجلها من خلالهم بس ،بس فيه سبب أساسي وقدرت ف انها تطور من نفسها وتقوم ف فترة صغيره وهي مساعدة أمريكا ليها هتقول مش أمريكا هيه الي دمرتها هتساعدها هنا لية تاني؟
أمريكا كانت خايفة من تمدد الشيوعية لأن بعد الحرب العالمية الثانية روسيا بدأت انها تنشر الشيوعية وأمريكا من الدول الرأسمالية ومش عايز روسيا تتحكم ف العالم ف بدأت تساعد دول زي اليابان وألمانيا كمان ويتم رفض فكرة الشيوعية ف العالم.
وبدأت اليابان تدور علي أي حد يخرجها من الى هيه فيه علشان تقدر تقف علي رجلها من تاني ف كان فيه واحد اسمه (جوزيف دودج) وده كان مهمته انه يقضي ع أي تضخم بيحصل ف أي دولة وعلي سبيل المثال دودج هو نفس الشخص الي خلي ألمانيا الغربية تقف علي رجلها هية كمان ،ومن هنا بدأ عمنا دودج ف أنه يحط خطة علشان يساعد بيها اليابان والفكرة بدأت ف التنفيذ من سنة 1949….
والخطة شروطها كانت كالآتي :.
بدأ أنه يتخلص من فكرة الشركات الخاصة وبدأ يعمل شركات عامة وتكون خاصة بالدولة ، بدأ يخلي البنوك اليابانية تدي قروض جديدة وتخلي الارباح الي جاية كلها تبقي للدولة ،وبدأ يعمل سعر محدد للعملة اليابانية وهي (الين) فخلي سعر الدولار ب360(ين) ياباني ،وكمان ساعد اليابان ف انها تحسن التجارة عندها بشكل كبير جدا.
وفي عام 1953 بدأت اليابان تاخد قروض من البنك الدولي وكانت اليابان ثاني أكبر دولة واخدة قروض ع مستوي العالم ،ومن بعد م أخدت القروض بدأت تدخل الفلوس دي ف الصناعات الثقيلة، وبدات تشجع الشركات ف انها تقوم علي رجلها زي الشركات الألكترونيه وشركات الموبايلات ، وبدأت ف انها تهتم بالصادرات وبقي معظم شغلها صادرات وبدأت ف انها تدور ع أسواق زي الصين تسوق فيها منتجاتها ،والي خلاها تتقدم بسرعة كبيرة جدا ان النسبة الجمركية والاضافات الي بتيجي علي الصادرات مبقتش موجودة خالص وكانت المنتجات اليابانية متميزة بحاجتين الأولي ان سعرها مناسب والثانية أن جودة حاجة الي بتصنعها ممتازة جدا ف ده ساعدها جدا ف انها تتقدم بسرعة كبيرة..
وفي النهاية دلوقتي بقي عندنا اليابان من أقوي الدول علمياً وعندها شركات زي توشيبا وهوندا وسوزوكي ونيسان وشركة سوني كل دول أصلهم ياباني ، ودلوقتي اليابان بتساهم بنسبة 40% في صناعة السفن في العالم واخترعت الإنسان الآلي وبدأت تطور فيه وحاجات كتير جدا جدا ، لو قولتلك عليها هتقول مستحيل تكون دي اليابان الي كانت منتهية، واليابان فضلت ف تقدم كدة لحد بداية سنة 1990 ،لما أمريكا حست أن اليابان ممكن تسببلها خطر ف المستقبل..
