كتبت : رضوى خالد
تحدث الفنان حكيم عن رأيه في أغاني المهرجانات مشيرًا إلى أنه موضوع شائك وحساس بالنسبة له مضيفًا: «هو موضوع شائك بالنسبة لي وحساس بس أنا شايف أنه بالنسبة للموضوع ده، النقابة والرقابة على المصنفات الفنية قايمين بدورهم على أكمل وجه بصراحة، وده من منطلق الحفاظ على الذوق العام».
وقال حكيم في تصريحات تلفزيونية: «وفي نفس الوقت الشباب دول ناجحين وبقا ليهم جمهور ونسب مشاهدة منقدرش ننكرها وفي نفس الوقت ده برضه لون جديد ومنقدرش نهاجمه، بس النقابة بتأدي دورها والممنوع مرغوب».
وأضاف : «كل لما ما نمنعهم الشباب بتروح لهم أكتر لأن الممنوع مرغوب لأنك بتتكلم مع جيل العولمة على الإنترنت، ومنقدرش نعاند ثقافة جيل بحاله مقدرش اقول بنحارب جيل لكن بنعاند جيل بحاله سواء في لون جديد او خامات موسيقى جديدة هما بيستخدموها وتقنية سمع الأغاني كمان بقت حاجة حديثة زي اليوتيوب والأبلكيشن وده بيكون عن طريق الموبايل ودي أكتر وسيلة انتشار».
يذكر أن آخر أعمال حكيم، هى أغنية “عدى الغزال” التى اقتربت أعداد مشاهدتها إلى المليون الأول منذ طرحها، نهايات ينايرالماضى، وهى من كلمات وألحان أحمد ناصر وإسلام كابونجا، توزيع إسلام ساسو، ميكساج أحمد جودة، ماسترينج أمير محروس، منتج فنى فايز عزيز.
